الدكتور عبد اللطيف.. طرق التعامل مع الطفل «الزنان»

أهلا بكم ولقاء متجدد مع العيادة واللي بنتكلم فيها عن كل ما يخص الأسرة وأطفالنا بشكل خاص...

النهاردة هانتكلم عن العيل الزنان ..العيل اللي بياخد اللي عاوزه من كتر الزن بتاعه ..

مبدئيا خلينا نتفق أن الطفل لغاية سن ٣ سنوات لا يحدد ولا يقدر احتياجات الأخرين..

الزن اللي أحيانا بيكون سلاح في إيد الطفل ودليل علي ذكاؤه لاستخدامه هذا السلاح ضد أبوه وأمه وإخوته الأكبر منه حتي يحصل علي ما يريد...
الزن ظاهرة طبيعية و موجودة عند أطفال كتير وزي ما قولنا أحيانا بتكون دليل علي ذكاء الطفل وخصوصا لما بيزن ويفصل بمزاجه...ولغاية ما يتحقق له ما يريد..ودا فعلا مشكلة كبيرة لأن مع زن الأطفال الواد دا بيفضل يستخدم الأسلوب دا والأب والأم. بيكون أمامهم حل من اتنين ..

يااما يسمعوا كلامه ويلبوا رغبته..

أو أنهم يتعصبوا علي الطفل ويضربوه ويعنفوه وطبعا لو تعصب الأب عينك ماتشوف إلا النور ممكن ينفخ الواد دا ..أو يخبطه برجل كرسي يكسرله ضلع هوا ورزقه بقي ...

و عشان نعرف حل الموضوع دا لازم مبدئيا نحدد أسباب الزن دا ..
ممكن عدم شعور الطفل بالأمان أو أنه متدلع زيادة عن اللزوم وطلباته مجابة..أو أنه بيحاول يكون ليه شخصية مستقلة لافتة للانتباه ..


والزن دا بيكون ليه أشكال مختلفة وتصرفات متنوعة ...

مرة تلاقي طفل بيصرخ جامد أو بيخبط دماغه في الحيط أو يؤذي حتي نفسه ..

وكمان في عيان ذكية بتخلي الزن دا مع وجود ناس غريبة لاستجلاب تعاطفهم معاه..واللي طبعا بيخلي الأب والأم يرضخوا لطلباته ...

طيب الحل إيه بقي مع العيال الزنانة دي ...

أولا واهم وأخطر نقطه..لازم يكون في تفاهم بين الأب والأم أو المربيين للطفل بشكل عام ..
طبعا لو في عدم تفاهم بين الأب والأم هايكون مشكلة أكبر في التعامل مع الطفل الزنان اللي منهم كتير بيستغل النقطه دي ويستجلب تعاطف أي منهما والكارثة الأكبر. تجاوب أحد الأبوين وتبدأ الخلل التربوي الرهيب من الحتة دي ...
ثانيا لازم يكون في قواعد محددة وواضحة للعب والنزول في الشارع والنادي والكمبيوتر والتلفزيون وخلافه..
ثالثا الفتي انتباهه لشيء أخر خلي انتباهه لا يتركز علي طلبه دا ..واشغليه بأي أمر أخر..
رابعا أوعي تستجيبي لطلبه طالما لا يطلبه بالشكل اللائق ودا هايخليه يحترم القواعد .
خامسا أوعي في وسط غضبه تتفاهمي معاه أو تحاولي تكلميه وتهديه ...المفروض الانتظار حتي يهدأ ونبدأ الحديث والتفاهم
سادسا.  كوني حازمة وغير ضعيفة خليكي قوية في طلباتك وأوامرك وأوعي تنساقي لرغبات ونظرات المحيطين وتحاولي تثبتي ليهم حبك واحتوائك لأطفالك...انتي أكبر من كدا ...
سابعا
ابعدي عن أسلوب (اهو كيفي كدا ) واللي معناه إن مفيش أسباب واضحة لعدم الرفض..لازم توضيح لأسباب الرفض دي...

وفي النهاية الزن من الأساليب المزعجة والسخيفة وتحتاج صبر وطول بال...


حفظ الله أطفالكم من كل شر يارب العالمين...