على بلاطة..«فى راجل يطفيكِ وراجل ينورك»

عايزة تعرفى انتِ اختارتِ صح ولا غلط بصى لنفسك فى المراية؛ لو لاقيتِ نفسك مطفية ومش عارفة انتِ مين تبقى اختارتِ غلط؛ ولو لاقيتِ نفسك منورة وفرحانة تبقى اختارتِ صح؛ الراجل الوحش بيطفيكِ ويقتل كل جميل جواكِ والراجل الكويس بينورك وكأنك مولودة من جديد؛ اوعى تقنعى نفسك بأنك تستحقين قلة التقدير أو سوء المعاملة عشان انتِ مقصرة فى حق حد ميعرفش حتى أقل واجباته تجاهك؛ الحياة أخد وعطاء والشىء اللى مش متبادل مهما كان قوته هايجى وقت ويموت؛ متفكريش إن الأنانية وحب الذات والتكبر وقلة الاهتمام فى العلاقة هى المعاملة اللى انتِ تستحقيها؛ انتِ تستحقين اللى يتعب علشانك؛ اللى يجرى مسافات عشان يوصلك؛ اللى يصون غيابك ويحفظ مكانك مهما غبتى عنه مش يبدلك بواحدة تانية أسرع ما يبدل هدومه؛ الشخص اللى أفعاله بتقولك بحبك فى اليوم ألف مرة أحسن بكتير من اللى كلامه كتير لكن مالهوش أى صدى على أرض الواقع؛ متقبليش بأنصاف الحلول لمجرد أن مركبك تمشى؛ المركب اللى تمشى بالتنازلات هايجى يوم وتغرق من كتر ما قدمتِ فيها تضحيات وتنازلات متقدرتش ومتشافتش؛ التنازلات مع الوقت بتفقد قيمتها مهما كانت كبيرة وهايجى يوم ومش هتتقدرى أصلاً؛ متفكريش إن صبرك على علاقة مؤذية أو سامة هيغير اللى قدامك؛ محدش هيتغير فى النهاية غيرك انتِ؛ هتلاقى نفسك بقيتى واحدة مريضة بالشك والقلق والخوف من الفقدان؛ هتبقى مش عارفة انتِ مين وإزاى بقيتِ عاملة كده وطول الوقت خايفة تفقدى حد مش خايف أنه يفقدك فى أى لحظة ده لو كان حاسس بوجودك من الأساس؛ هاتبقى بتعملى حاجات مش شبهك لمجرد إنك ترضى حد عمره ما دور ولو لمرة على اللى بيرضيكِ عشان يعمله؛ إهربى من أى حد بيأذيكى بفعل أو بكلمة مهما كان هو مين بالنسبة لك؛ العلاج عمره ما هيشفيكِ طول ما انتِ واقفة فى نفس المكان اللى جاب لك المرض؛ أحياناً الدواء برغم مرارته لكن فيه الشفا؛ انتِ قوية بوجود الناس ومن غيرهم مش مستنية حد يقولك كلمة كويسة عشان تحسى بالتقدير لأن لو مقدرتيش نفسك من جواكى مش هتلاقى حد يقدرك ولو لاقيتى فى الغالب تقديره هيكون دايماً مرتبط بمصلحة منك بمجرد ما تنتهى هيختفى من حياتك؛ متسمحيش باستغلالك طول ما فيكى نفس تكملى فى الحياة بنفس القوة والثبات والمبدأ لأن محدش فكر انه يتغير علشانك يبقى ليه انتِ اللى دايماً الطرف اللى بيغير من نفسه عشان حد تانى؛ الحياة مش بتقف على حد ولا عمرها هتقف؛ طول ما انتِ عايشة هتقابلى ناس على هيئة دروس فيهم اللى هيضيف لك وفيهم اللى هيقلل منك لو سمحتى له باحتلال مساحة من حياتك رغم إن ربنا بعت لك علامات كتير إن وجوده كان غلط وبيقتل جواكى حاجات يوم بعد يوم بس كملتى؛ الناس اللى زى دى لازم تهربى منها وتخرجيها من حياتك النهارده قبل بكره حتى لو روحك متعلقة فيهم؛ لأن مش كل اللى بنتعلق بيه بيكون فى مصلحتنا ممكن عشان بعيد مش شايفة الصورة على حقيقتها لكن كل ما هتقربى أكتر هاتبقى زى اللى ماشى على الأشواك وبالرغم من كل الجراح دى هتقربى فى النهاية على تفاصيل أبشع ألف مرة من وجع الجرح اللى حسيتى بيه على ما وصلتى للمسافة دى؛ لو كنتِ حزينة أو حاسة بفراغ ووحدة أو مش قادرة تتجاوزى مرحلة الحزن اللى انتِ فيها بصى لنفسك فى المراية من جديد لو لاقيتى نفسك نفس الشخص اللى كان قبل كده كملى فى حزنك عليهم ولو معرفتيش انتِ مين ولاقيتِ ملامحك دبلانة وتعبانة فوقى لنفسك وإرجعى لنفسك القديمة وافتكرى حاجة مهمة إن زعلك غالى ولازم يكون على حاجة غالية وناس تستحق يتزعل عليها؛ الزعل بيكون على ذكريات جميلة مش أيام بكيتى فيها أكتر ما ضحكتى؛ بيكون على ذكريات وكلام حلو كنتِ بتسمعيه مش خداع وكدب وخيانة طول الوقت؛ المكان اللى مش حاسة فيه بالأمان اهربى منه لأن محدش هينقذك ويخرجك غير نفسك اللى دخلت ليه من الأول بإرادتها؛ متسبيش أى حاجة ممكن ترجعك للطريق ده تانى لأن هيطفيكِ وهيغيرك وهيعزلك عن ناس وفرص كتيرة كويسة فى الحياة كنتِ تستحقيها وتقدير كان المفروض من البداية تستحقيه مش بتبصى على الناس حواليكِ وتتحسرى على نفسك اللى كأنها بتشحت الاهتمام من حد ميعرفش حاجة عن العطاء؛ صدقينى الاهتمام لو اطلب بيفقد معناه؛ لو حسيتِ إنك بتطلبى الاهتمام تبقى مع الشخص الغلط لأن اللى بيحب بيريح اللى بيحبه وبيقدره وبيعمل اللى يسعده حتى لو فى أبسط التفاصيل؛ مش بيكون أنانى ومتسلط ومش شايف غير نفسه وأنك مجرد رقم بيكمل لوحته المتشبعة بالنرجسية والأمراض النفسية؛ متطلعيش حد لفوق وهو ميستحقش لأنه هينزلك انتِ أول حد لتحت وأول ما هايشوف نفسه هيشوفها عليكِ؛ انتِ مش سلعة ولا أقل من حد عشان تدى شخص أكبر من حجمه وقيمته فى حياتك؛ ولو معرفتنيش تقدرى نفسك بالشكل اللى يليق بيكِ متلوميش الناس إنها مقدرتش أى حاجة عملتيها.